نعرف باش نشري الشبوك مع بعض الناس بالتدوينة هذي أما إلي يعرف روحو حساس برشة على ...بو رقيبة ، الأب الروحي لتونس، وإلي يحبو أو تحبو لدرجة أنه كان مستعد يشد الصف نطلب منو ما غير ما يقرا ومن بعد يقوم يبكيلي هوني ... أنا هنا باش نعطي رأي شخصي ومانيش باش نجامل حتى حد ...
يا سيدك هالأيامات حملة قد السماء على سي بو رقيبة ، إي علاش لا ، رئيس تونس الأول ، نحى النظام الملكي وحط نظام جمهوري ، يبدل فيه الاتخابات كيف عام 81 ، ويقتل فيه العباد إلي تطلب في الخبز (على القليلة بن علي قتل ناس تحب على كرامة -حاجة غير مادية ، غير ملموسة -) ، وهو كان سبب في ظهور التيار الإسلامي المطرف و خلاه ينمو كإجابة إلى التيار اليساري إلي كان مقلقو (اسمعوا اش يسمي المعارضة) في السبعينات ، وخصتاً مع العنف الجامعي إلي يسميوه اليسارين في مذكراتهم بالمراهقة السياسية ...
بو رقيبة جاء وسكر أكبر معلم في تونس (جامع الزيتونة - يعني قطع مع تاريخ تونس ) هذاك اش خلانا اليوم نشوفو ناس لا تعرف لا لغة ولا قرأن ولا فقه تاقف تخطب قدام الداخلية ... نزيدكم ؟ اه لا يزي لا نولي إسلامي متخفي نكره بو رقيبة على خاطر عمل إلي يقلك "مجلة الأحوال الشخصية" ، إلي على فكرة عملها الطاهر الحداد إلي بدورو تشبع بأفكار بن ضياف وعبد العزيز الثعالبي ووو-... يعني ما جاب شي من راسه سي لحبيب ... أو على خاطر عمل مدارس ؟ تقول في مصر (إلي مثقفيها يقسمو بالمثقفين متاعنا 10 مرات) أو المغرب ، أو حتى الجزاير ما يعرفوش يحلو كتاب ...
لا ويحكيو يقلك "كان مش هو راك ما تعرفش تقرا " ... باهي على خاطر علمني نقرا، واكتشفت إلي هو دكتاتور ما ننتقدوش ؟ شبي البعض يسب في ربي ؟ ياخي بو رقيبة خير ؟
أنا إلي يغيظني اليوم يجيو في حنة البغل برنامج يحكي على بو رقيبة ، إلي يبكي وإلي ينوح ، وبن علي ظلم بو رقيبة ، ونحى النشيد الوطني وما خلاش الناس "تحزن" على وفاته ... تي شتحبو يعمل ؟ اش عمل بو رقيبة في الباي ؟ فرح بيه ؟ تحبوه يخلي نشيد يحكي على رئيس قديم ؟ كفانا تخليد وتمجيد للعباد من فضلكم ... يزينا من إستبلاه الشعب
يا أخي كي انتم تحكيو على تاريخ البلاد ورجال البلاد ... أحكيو على لزهر الشرايطي (إلي بو رقيبة حتى قبرو ما دلناش عليه ... ) ، صالح بن يوسف ، البشير صفر و عز الدين القفصي و فرحات حشاد (إلي يقال أن بو رقيبة عندو يد في اغتياله و الله أعلم ) وحرب بنزرت إلي مات فيها سخط عباد في جرة بو رقيبة ، ومن بعد يقلك غلط ... إي غلط في ألاف الأرواح ... و لا يجيك واحد في برنامج (يضهرلي متاع حنبعل زادة) ويقلك "ربما أحسن حل عملو بو رقيبة هو أنه حب يوحد البلاد -ما خلا حتى حد يتكلم معاه- " ... علالش قدامك باش نمشيو الكل في نفس الثنية ؟ عادي يقتل ويغتال ؟ اه حقة احنا في دولة ما تحاسب حتى "شخصية" على القتل والإغتيال بخلاف الإسلاميين على خاطرهم يحكيو بإسم الدين ويحبو يتسلطو علينا ... (مرة أخرى مانيش مع الإسلاميين ، أما مع أن كل من يقتل روح يتحاسب و لو مات)
وأسفي وألمي كبيران على التصويرة هذي ... في 2011 ، إلي يقلك ناس تبني في ناطحات سحاب ، وصوارخ وهاوكنغ مخو لاهب في حل الغاز الكون ... التوانسة يبنيو في ضريح متاع رئيس عندو 23 سنة ملي مشى ... على قريب تخرج رزنامة فيها موسم الحج نشالله وتقبل منكم بورقيبة أعمالكم الصالحة وولائكم له ... طوفوا به حتى تمطر السماء عليكم مدرارا
بو رقيبة راهو أسس لدولة بوليسية ، هو سن الدكتاتورية والنفوذ إلى الحاكم ، بو رقيبة وصل في وقته الناس ترقل خوف منه ... أنا جدتي تخاف تدخل ب-500 مليم للتوالات (حشاكم) فيها تصويرة سي بو رقيبة ... ومن بعد تقولي قرى الناس ؟
بو رقيبة كان أول إنسان أجهض العلم والإبداع العلمي في تونس - نذكر على سبيل الذكر ولا الحصر ، سي البشير التركي - ... وملاحظة بربي ، أنا نشوف أنه منذ الإستقلال ما عاش عندنا مفكرين ، إلي مثلو تاريخ تونس الكل جاو قبل الإستقلال ... نسكت خير
نحكي، نحكي أما زايد ... التاريخ يكتبو إلي يربح ،وبالطبيعة بو رقيبة باش يخرج بطل لأنه هو من أشرف على كتب التاريخ ... هذا الكل وبالطبيعة نعترف إلي عمل برشة حاجات باهيين وأنا هنا موش باش نحكي عليهم ، أهوكة تبركالله الصفحات على الفيسبوك برشة تلقاو ما يشفي غليلكم ...
نحب نشير أنه كلامي ربما حاد ... موش كره لبورقيبة ، أما الشاي إلي نشوف فيه ينطق من الأجناب ... فيبلنا تحررنا وكسرنا الأصنام ، نقومو تو نمجدو ... نكملو نعملو تماثيل لحنبعل وعليسة ونحطوهم حتى هما في الشوارع .
